شهادة طبيية على فض اعتصام رابعة

نشرت الطبيبة سهام عبد العزيز شهادتها على ضحايا فض اعتصام رابعة على صفحتها على فيس بوك يوم 15 أغسطس 2013 هنا.

تقول الطبيبة سهام عبد العزيز:

“أنا اسفه ياجماعه !

دى مش تانى اسوء نبطشيه قضتها فى حياتى … دى اسوء نبطشيه على الاطلاق

عالاقل28 يناير كان الحزن مليان امل … المرادى الحزن مليان يأس وغضب وإحباط

انا لو كنت بكره الشرطه قبل النهارده مره ، انا دلوقتى بكرها مليون مره

صلف وغرور وعجرفه .. تعدى واهانه ومذله لاى واحد كل تهمته انه بذقن! ،

حتى لو مكنش اخوان ,حتى لو مكنش فى المظاهرات اساسا !

لدرجه ان الشرطه هى اللى كانت بتقرر حتسمح لمين يتحجز ومين يخرج غصب عننا !

مفيش حاله من الاخوان روحت , كله اتقبض عليهم ولو اهلهم اعترضوا قبضوا على اهلهم كمان !

ولو العيان نزف لدرجه انه مش قادر يمشى معاهم كانوا بيسحلوه على الارض لحد بره !

البلطجيه مع الشرطه رادمين المستشفى و بيلطشوا للمصابين فى الرايحه والجايه وواحد منهم ماسك مشرط بيغزهم بيه وهو معدى من جنبهم ولا حد قادر يكلم

ممنوع حد يتصل باهله يعرفهم عايش ولا ميت ولما دكتور امتياز غلط وحاول ياخد رقم فيهم الظابط مسك فيه وكان حيضربه وكله بيتفرج لدرجه انى مبقتش عارفه انا بعمل ايه ومديت ايدى على الظابط زقيته بعيد من غير وعى !

حاله داخله ارستد ورجعت , مضروب على دماغه متخيط ميت غرزه وواخد دم وبلازما وحالته سيئه ..الجراحه حجزته قام دكتور كبير كنت بحبه وصدمت فيه صدمه عمرى اخلاه مش عارفه ليه

خدوه من جديد سحلوه وضربوه وبهدلوه كان حيموت ف ايديهم رجعوه على الصدمه تانى
حاولت احجزه جابو الدكتور الكبير اخلاه تانى !

اتحايلت عليه عشان يحجزه قلتله الراجل ده لو خرج حيتقتل النهارده وحنشيل ذنبه معاهم قالى ده مش شغلنا يا دكتوره ! عندما تنعدم الرحمه! قد ايه كنت حاسه بالقهر وانا مش عارفه احجز دكتور صيدلى زميلنا فضل يترجانا متسبهمش ياخدونى من هنا حيبهدلونى، ارجوكم قد ايه كنت حاسه بالذل وواحد من مصابى الاخوان بيتسحل وبيضرب بالحزام والعصيان ويداس عليه بالجزم فى وسط الاستقبال وهوبيصرخ على آخره صراخ يقطع القلب انجدونى يا ناس انجدونى يا ناس …..ومدراء المستشفى ولا كانهم شايفين حاجه!
قد ايه كنت حاسه بالمهانه وانا بسرق ارقام تليفونات المصابين وانا بخيطهم عشان اطمن اهلهم عليهم
قد ايه كنت حاسه انى غريبه ووحيده فى وسط عالم قذر همجى متوحش اول مره اشوفه بالقرب ده ويارتنى ماعمرى شفته

نبطشيتى خلصت من ساعات .مروحتش ومش قادره اروح ،صحيح انا عاجزه عن نصره المظلوم لكنى عاجزه اكتر انى امشى واسيب بقاياهم ورايا
كل اللى قادره عليه ان احاول اثبتهم واقولهم اصبر واحتسب يابطل ،الا ان نصر الله قريب وقلبى يستغيث بداخلى متى هو؟ …

قل عسى ان يكون قريب

احنا مقمناش بثوره يا ساده دى كانت مسرحيه هزليه ضحكنا على نفسنا بيها سنه كامله …الشرطه باقيه والبلطجيه باقيه وامن الدوله باق ولاعزاء للحريه والكرامه والعداله الاجتماعيه

حسبى الله ونعم الوكيل فى كل من ساهم ان نصل الى ما وصلنا اليه اليوم من وحشيه وساديه مريضه مجنونه .. سواء بنزوله او بتفويضه او بتأييده او حتى بصمته!

والى الله المشتكى … الى الله المشتكى

ولا حول ولا قوه الا بالله”

Submit comment

Allowed HTML tags: <a href="http://google.com">google</a> <strong>bold</strong> <em>emphasized</em> <code>code</code> <blockquote>
quote
</blockquote>